Босорканя — аґресівна особа світа на Коцках. Босоркані сут людьми другої габы заселеня, но дали ся у чудні наукы зільоваріня, спозад чого утратили людську бесіду, яли говорити по свому, домак ся удділили уд другых люди. Датко рахує босоркань фрасами, спозад того, ож они нападавут на люди тай авантюріштув, но они и самі уд себе сут людьми, та раховати йих фрасами, небрязьов, не буде технічно справно.
Історія
За леґендов, котру описав у своюй книзі "Маґія: історія тай хоснованя" бібліотекарь Соломон, прощун бы, у другув габі заселеня быв всплеск інтереса ид наукам: люди учили ся нарабляти из маґійов, пробовали забайовати серсаму. Поєдны люди орґанізовали тайомні ґілдії, де експеріментовали из варіньом небезпечных субстанцій. Душпастырі, ґілдія котрых ся майліпше знала на варіньови маґічного питя, варовали люди, ож из сима технолоґіями треба ся дуже сокотити, бо злакомиш ся на ферментованоє паучоє око раз — булше ся не зопреш. Тайомна ґілдія, у котру ишли лакомі ид силі зіля бібліотекарі тай душпастырі, домак ся завгуріла питьом небезпечных текутин, тай зачала бізрядити у селах, нападати на чилядь, домак утративши розум.
Помішаных членув ґілдії зачали кликати босорканями тай угнали гет из сел, хоть многі люди войотили обы йих забити, авадь хоть покласти у темницю. Паціфістічна налада тогдышньых біровув не дала забити босоркань, бо они ай так ся убставали людьми, лиш помішаныма. Босоркань угнали у хащу, у болота, де онь до днесь можете найти йихні хыжкы: поєдны зарваті, а у поєдных щи найдете йих небезпечных ґаздовув.
Общі характерістікы
Босоркані сут людьми, котрі ся удкололи у окремый наруд, не розумівут ужек нашу бесіду, тай другі люди не розумівут йих. Будут аґресівні ид ушыткым людьом, авантюріштом, ґолемам. Кедь стрітите босорканю даґде — сокотіт ся, бо она вас зачне атаковати, буде у вас метати шелиякі шкодливі зілля, из слабостьов, отровов, ци спомаліньом. Аж забити босорканю, та може лишити по собі шелиякі інґредієнты на варіня: світячый порох, пушковый порох, пусті склянкы, паучі очи, копачі, пораз даєе готові зілля.