Реселув на мобы — чудна конструкція на жертвоприношіня фрасув, придумана авантюріштами третьої габы заселеня, но набрала истину популарнусть ужек у час четвертої.
Історія
У час заселеня людность из третьох габы стрїтила ся из чудным феноменом — по ночи самі уд себе у потемкох ся появлявут шелиякі фрасы, котрі провбайлувут забити хоть-якого авантурішта, котрого стрітят. Сяка велика загроза не напудила смілых бетярюв, котрі из мечами тай фийсами пустили ся у буй из небрязотов. По битві авантурішты навчили ся много всякого, дустали скушеності, тай запримітили, ож фрасы были убраті у непудлоє цуря, котроє пак мож пустити на хосен.
Єдному из авантуріштув, вже ниє тямку котрому, прийшла думка учинити штруктуру, котра бы поволила автоматізовати процес. Сяк зародив ся реселув на мобы тіпа „Грибик“. Названый сяк спозад того, ож коштрукція візуално припоминат гриб. Такый реселув авантурішты зачали хосновати, обы безпечно забивати фрасув, тай добывати из того скушеності, ипноє цуря, тай шелиякі другі доброты, котрі фрасы ненароком узяли у рукы тай принесли из собов.
Конштрукція
Придумана конштрукція є из чотырьох сеґментув: платформа чеканя, платфома появліня фрасув, кышка, тай місто жертвоприношеня.
- Платформа чеканя ся мусит находити руно пуд хмарами. Там авантурішты чекавут цілый день, лишек терпеливі можут свойим спокойом приманити доста повно фрасув.
- Платформа появліня фрасув мусит ся находити за 100 метрув пуд платформов чеканя, но за 20 метрув над містом жертвоприношеня. На сюй платформі, гикой ся розуміє из назвы, появлявут ся фрасы. Нитко не знає чого тай як, айбо оно фурт фунґує єднако — фрасы взникавут самі уд себе у потемкох, чим поблизь є терпеливый авантурішта.
- Кышка є просто стовпом, котрый веде долув из платформы появліня фрасув до міста жертвоприношеня.
- Місто жертвоприношеня є безпечным містом, куды падут фрасы по кышці. Спозад паданя из великої высоты фрасы сут учмілені, та є релатівно безпечно забивати йих даже авантуріштам-зачаточникам без даякої доброї збруї. Сесе місто у булшости трафункув має пуд собов тивчирі з ладами, обы автоматічно збирати из фрасув упавшоє цуря.