 |
||
| Вассерово | ||
|---|---|---|
| Тіп | село | |
| Населеня | пиля 40 селянув | |
| Коордінаты | 5753, -2181 | |
| Природна зона | островы, хащі | |
| Голова | Вальтер Вощик | |
Ва́ссерово – село на выході. Ексколонія села Поголяниця. Є членом Орґанізації споєных сіл (ОСС). Бировом села є Вальтер Вощик. Спозад читавого водного ландшафта село дустало назывку уд слова „Wasser“, котроє подля леґенд у старому світови значило „вода“.
Історія
Колонія „Вассерово“
Земля Вассерово, была удкрыта поголяницькыми колоніштами у приблизно 80–85. роках. Сперед тым земля была пуд управліньом фрасув тай рабловув, айбо поголяницька екшпедиція їх изничила тай узяла пуд свуй контроль раблувськый особняк. Пак было найдено тай услобожено поселеня жителюв. Из часом на земльох Вассерова ся начав розвуй інфраштруктуры, промысловості тай руст популації. Были розчищені хащі, поклали ся нові хыжі тай фармы. Популація жителюв ся пудняла из 4–5 до 40 жителюв тай на днешньый день продовжат ся пуднимати дале.
Довгый час проблемов было добираня до метрополії — Поголяниці, котроє брало 3–4 дны лодьков по морьови, спозад чого Вальтер Вощик пруклав штреку „Вассерувськый путь“ тай тонел Чорноташ, котрый изкапчав штацію „Іподром“ из колонійов. Сяк путь уд Поголяниці до колонії Вассерово покуртав до 1,5–2 днув.
Из розшыріньом села ся поклав собор св. Илії, турня „Вассертавер“ тай другі будовлі.
Независимость
Колонія жила тай процвітала, айбо зо змінов власти у Поголяници, жителі колонії зачали кываня за независимость. Колоніалный уряд Вощика рішив ся на такоє удкапчаня — тай у рокови 113. мирно, уєдно из делеґаційов из Куртового поселеня, колонія голосила за независимость уд Поголяниці. У тот такой рук у Вассерові была вчинена унія ОСС, де дали перші свої пудписы уряды Вассерова тай Куртового поселеня. У теперішньый час Вассерово участвує у помочи новоствореному селови Гафош: из недавньых дійств є покладена Вассеровом штрека, котра споила село из желізным путьом Ґілдії Ґаздув тай Авантуріштув тай помуч ресурсами на розбудову села. У будучности село планує грубі проєкты тай фонд про помуч другым молодым селам Нового Світа.
Ґеоґрафія
Вассерово — архіпелаґовоє село, розділеноє ріками. Село ся ділит на три районы: Вассерово-Варош, Вассерово-Островець тай Вассерово-Збраславія. У будучности у селови мают ищи ся покласти 3–5 районы. Село має коло 20 улиць.