Фрасы

Фрасы — ґрупа чудных створ у світови Коцок, котрі сут аґресівні ид людьом, появлявут ся самі у потемкох, поєдны ся такой боят світла тай сонця. Ися катеґорія є доста широка, но не ушыткі аґресівні створы сут фрасами, наприклад „хактоші“ бизувно не сут фрасами, а за босоркань чилядь щи дебатує, ци варта босорканю раховати фрасом ци нє.

Филі фрасув (вонкові)

Катеґорізація сього тіпа створ є дуже непроста. Они ся появлявут у потемках, но не усі ся боят світла. Они сут аґресівні ид людьом, но поєдны фрасы не сут аґресівні ид ушыткым людьом, ай лиш ид авантюріштом. Но тай головноє — нитко из них не є Фрасом (респ. не має рогув, копыт, не искушає чилядь)

1. Зомбій — ачий майпошыреный филь фрасув на Коцках. Появлят ся у потемкох, горит на сонцьови (кидь не має калапа). Буде аґресівным ид ушыткым людьом, ид желізным ґолемам, ид авантюріштом. Кыват ся помалы, мож го забити не тяжко. По собі може лишити груду погнилого мняса, пораз даякоє доброє цуря.
2. Кустяк — єден из майпошыреных филюв врасув на Коцках. Появлят ся у потемкох, горит на сонцьови (кидь не має калапа). Буде аґресівным ид ушыткым людьом, ид желізным ґолемам, ид авантюріштом. Не шіковно собов гыбат, айбо має лук, та убде провбайловати стріляти у чилядь издалека. По собі може лишити кустя, стрілы, лук, пораз даякоє доброє цуря.
3. Блудьош — филь кустяка, што ся знає появляти лишек у снігови. Горит на сонцьови. Буде аґресівным ид ушыткым людьом, ид желізным ґолемам, ид авантюріштом. Не шіковно собов гыбат, айбо має лук, та убде провбайловати стріляти у чилядь издалека. На удміну уд простого кустяка — фурт має забаяні стрілы, што робит його многым май небезпечным уд простого скелетона. По собі може лишити кустя тай забаяні стрілы.
4. Кріпер — ходит помалы, потихы, но кидь дуйде та най Бог заварує! Появлят ся у потемкох, не горит на сонцьови. Чогось не є аґресівным ид ушыткым людьом тай ґолемом, мече ся сугубо лиш на авантюріштох. Кидь пудыйде ид вам близко — розпукне ся, тай розорве ушытко круг себе. По смерти лишит за собов мало пороха. Є гіпотеза, ож кріперы ото душі прадавньых авантюріштув, котрі булше не годни узяти у рукы чекан та йти у далекоє путьованя, ипен спозад того они ся мечут сугубо на другых авантюріштув.
5. Утопелник — поєдны авантурішты рахувут го пудфильом зомбія, другі — окремым фильом фраса. Не позиравучи на тяжкостї катеґорізації, мавут много подобного из простым зомбійом. Появлявут ся у водї, горят на сонцьови (не было запримічено раз ани єдного утопелника из калапом). Буде аґресівным ид ушыткым людьом, ид желізным ґолемам, ид авантюріштом. Кыват ся помалы, мож го забити не тяжко. По собі може лишити груду погнилого мняса. Поєдны утопелникы знавут хосновати тризуб — читаво небезпечну зброю, котру не освойили прості зомбії. Из тризубом утопелник є дуже небезпечным про простых люди тай авантуріштув, є рекомендовано уд такого нараз утікати.
6. Зомбій-дітвак — руно такый, гикой великый зомбій, лиш дітвак. Появлят ся у потемкох, горит на сонцьови (кидь не має калапа). Буде аґресівным ид ушыткым людьом, ид желізным ґолемам, ид авантюріштом. Шіковній ги фрас (нарочна фіґля)! Зась не ясно, ци може ся удділяти у свою катеґорію окреме, авадь ци має ся раховати уєдно из зомбіями. По смерти лишит руно тото самоє, што великый зомбій.
7. Попалиньош — филь зомбія, но появлят ся сугубо у жаркых містах, гикой пустыня. Появлят ся у потемкох, но на сонцьови не горит. Ачий єден лиш филь зомбія, котрый ся не бойит світла. Буде аґресівным ид ушыткым людьом, ид желізным ґолемам, ид авантюріштом. Кыват ся помалы, мож го забити не тяжко. По собі може лишити груду погнилого мняса.
8. Ендермен — высокый довгоногый чорный фрас (майпохожый на фраса помежи другыми представниками сиї катеґорії). Може ся появити у любый час дне тай ночи, не бойит ся світла. Сам выд себе не є аґресівным, кидь не провокованый. Кидь му побзераєте у очи — зачне вас страшно трепати. Знавут пораз брати у рукы землю авадь пісок тай носити за собов, пак го даґде лишат де вам не треба. Є гіпотеза, ож ендермены тото сут люди первої габы заселеня, авадь скорше тото, што ся из тых люди убстало. Рекомендовано іґноровати ендерменув, не позирати йим у очи, не творити ся на них.
9. Паук — веліканськый боґар, появлят ся у потемкох, не горит на сонцьови. Буде аґресінвым в основному ид ушыткым людьом, ид желізным ґолемам, ид авантюріштом уночи. Кидь го перестріните удинь, годен вас проіґноровати, аж не будете нападати на нього. Кидь го забити — лишит по собі нитку тай пораз своє око. Є щи филь отровного паука, котрый є мало меншый. Зась не є ясно, ци варта його удділяти у окрему катеґорію, ци мож зараховати уєдно.
10. Слызак — жива бамбуля слыза, технічно ся рахує фрасом. Не сонцьови не горит, появлят ся не у потемкох, а лиш у конктеных містах, наприклад на болотах. Слызак буде аґресівным ид людьом, ґолемам, тай ид авантюріштом. Може ся появляти у шелиякых розмірах, уд домак ґіґанта до малинького. Аж го забити — розпадат ся на пару меншых слызакув, аж закидь не позабиваєте маймалых. По смерти лишит по собі ковтю слыза.

Інтересноє

Ушыткі фрасы из списка мавут даякі свої причуды, котрі не мали бы мати ниякого смысла у світови, но ставут ся. Наприклад:

• Зомбії можут по смерти лишити по собі злиток желіза, морков, ци даже булю. На кый фрас йим тото треба — нитко не знає.
• Зомбії (тай утопелникы) можут брати у рукы всячино, што найдут на земли — хоть-якый блок ци серсаму. Є гіпотеза, ож сяк чинят спозад споминок из часу, кой самі были людьми.
• Не є ясно, ци зомбі дітвакы выроставут у великых зомбіюв, ци навхтема ся убставут такыми. Кажут, ож люди другої габы пробовали чинити експеріменты из тым, но сесе лиш на уровньови леґенды, бо не было найдено ниякых письмовых споминок за тото.

• 

  Кріпер у лодьці у озерови. Гикой приклад того, як фрасы люблят лодькы.

  Ушыткі фрасы (кроме паукув) мавут чудну тягу ид лодькам — нич до бы у них сідали! Хоть направду, у лодькы люблят сідати гет ушыткі, не лиш фрасы. Сесе зась пуддержує гіпотезу того, ож фрасы колись давно тоже были людьми, та такі дії из йих бока сут сугубо провбами емуловати людськоє хованя. За сесе ся знає, як за феномен „лодькованя“.